Mas pahugtan pa sa Businesss Permit Licensing Office, sa dakbayan sa Mandaue ang pag-inspection sa mga nagkadaiyang establisyemento nga anaa nahimutang sa dakbayan.
Kini ang gibutyag ni Atty. Lizer Malate, ang pangu sa Businesss Permit Licensing Office sa dakbayan sa Mandaue, nga mas triple ang ilang pagpatuman og pag-obserbar sa mga nagkadaiyang establisyemento nga adunay kalapasan sa natad sa pamatigayon.
Gumikan sa kadaghang nasayran nga adunay mga kalapasan nga mga establisyemento hilabi na sa pagsumiter og mga rekisitos sa ilang aplikasyon, lakip na usab ang mga adunay misdeclaration sa negosyo, hinungdan nga magpahigayon ang buhatan og “Business One Stop Shop”.
Tumong sa maong programa, ang pagpahibalo sa mga bag-ong pamalakad sa mga nagkadaiyang partner agencies sama sa Bureau of Fire ug uban pang buhatan.
Hinungdan nga pahugtan na gayud ang pag-inspeksyon sa mga establisyemento sunod tuig, gumikan kay aduna usab ba-ong regulasyon nga ipatuman sa Central Office alang sa mas striktong regulasyon sa business permits.
Nadungagan usab ang mga sakop sa BPLO hinungdan nga mas dali nalang sa buhatan ang pag-obserabar sa mga nagkadaiyang establisyemento.
