Gikatakdang mumugna og Sinulog commemorative coin ang Bangko Sentral ng Pilipinas (BSP) isip paghandom sa kinadak-an ug labing gisaulog nga kapistahan sa tibuok Pilipinas nga nanukad gikan diri sa dakbayan sa Sugbo.
Kini ang gianunsyo sa BSP atol sa pakigtagbo niini kang Cebu City Mayor Nestor Archival Sr. niadtong Lunes, Disyembre 1 nga gipangulohan ni Regional Office Director Anna Clara Oville ug REAS Acting Head Roxan Mujeres.
Gipahibalo sa mga opisyal sa BSP nga i-prioritize nila sa buwan sa Enero 2026 ang pag-release sa maong commemorative coin nga itakda sa kapistahan sa Sinulog.
Gihangop ni Archival ang maong kalambuan diin gihimug-atan niini nga ang Sinulog usa ka globally-recognized celebration nga takos sa maong pasidungog.
Unang iisyu sa BSP ang anaa sa 500 ka mga commemorative coins ngadto sa Kagamhanang Dakbayan diin aduna kiniy balor sa P5,000. Gani dugang pa ni Archival nga tun-an pa nila sa City Hall kung dugangan pa kini aron makahigayon ang publiko nga makakuha niini.
