CEBU – Human sa duha katuig nga wala makapahigayon sa mga aktibidad sa semana santa, ipahigayon na ugmang adlawa ang naandan nga Buhing Kalbaryo sa Archdiocesan Shrine of San Nicolas de Tolentino Parish, sugod alas 10 sa buntag hangtud na sa crucifixion sa alas 3 sa hapon.
Gibutyag ni Archie Estoconing, usa sa mga cast sa Buhing Kalbaryo, nga kini ang silver year anniversary o 25 katuig sa maong kalihokan, hinungdan nga gipaningkamotan sa mga organizers nga aduna kini makita nga kausaban itandi sa mga nakalabay nga katuigan.
Matud pa, gilangkoban kini sa 90 ka mga cast, lakip na ang mga major role, ug kining tanan ang adunay koordinasyon kauban ang Cebu City Government, ingon man ang ilahang mga sponsors.
Giklaro ni Estoconing nga abli alang sa publiko ang maong pasundayag, apan ilahang gihangyo ang tanan nga pabilin nga sundon ang health protocols, ilabi na ang pagsul-ob ug facemask.
