Nipasidaan ang Civil Aviation Authority of the Philippines (CAAP) sa posibleng pagkahulog sa mga debris gikan sa paglusad og space rocket sa China.
Ang Philippine Space Agency (PhilSA) una nang mitaho nga gilusad sa China ang Long March 8A rocket gikan sa Hainan Commercial Launch Site sa Wenchang, Hainan niadtong, Miyerkules, Hulyo 30.
Kalabot niini, epektibo ang notice to airmen (NOTAM) nga giluwatan sa CAAP sa umaabot nga Agosto 4 gikan sa alas 6:14 sa gabii hangtod 6:42.
Kini naglangkob sa usa ka lugar nga 40 nautical miles sa habagatan-sidlakan sa Puerto Princesa Airport gikan sa surface level hangtod sa unlimited altitude.
Gitambagan sa ahensya ang mga airline ug piloto nga likayan ang gitudlo nga mga lugar kung diin mahimong mahulog ang mga rocket debris sa gitakda nga oras ug adlaw.
Ang gitudlo nga drop zones mao ang 120 nautical miles gikan sa Puerto Princesa, Palawan ug 42 nautical miles gikan sa Zamboanga City, Zamboanga Del Sur.
Gitambagan usab ang publiko nga i-report ang mga rocket debris nga mahimong maanod ug motugpa sa kasikbit nga baybayon sa lokal nga awtoridad ug likayan ang direktang kontak tungod sa peligro nga mga kemikal niini.
