CEBU CITY — Selos ug paggamit sa ginadiling drugas ang gitan-aw nga mga anggulo sa kapulisan human nga naghikog patay ang lalaki sulod sa iyang panimalay sa Sitio Miga, Brgy. Pahina Central. sa dakbayan sa Sugbo.
Giila ang biktima nga si Jessie Redilosa, 27 anyos, adunay live-in partner, ug usa ka call center agent.
Base sa imbestigasyon sa Homicide section sa Carbon Police Station, adunay panaglalis ang magtiayon sa miaging adlaw.
Sa wala pa nahitabo ang maong insidente, milakaw ang inahan nga si Vivian Redilosa kuyog ang kapuyo sa biktima aron pa-check up sa anak niini.
Matud ni Police Chief Master Sergeant Joffrey Gutual nga nakaplagan sa kapuyo si Jessie nga nagbitay ug wala nay kinabuhi diin gihiktan ang liog niini og electrical wire.
Nagkanayon si Vivian nga maglalis pirmi silang Jessie ug ang kapuyo tungod lang sa selos.
Gani mibahad ang biktima nga iyang patyon ang kapuyo kung aduna kini laing hinigugma.
Dugang pa ni Vivian nga tiggamitan usab si Jessie og ginadiling drugas.
Walay nakit-ang foul play ang paghikog sa maong lalaki ug anaa na kini sa punerarya alang sa autopsy. (With reports by Bombo Lahvi Quiñones)
