Cebu City- Gipamatud-an sa mga Cebuana Breast Cancer Survivors nga dili babag ang ilang kondisyon aron mapakita gihapon ang ilang abilidad ug kapasidad nga makadala ug dungug sa atong nasud.
Subay sa kasaulugan sa breast cancer awareness month karong buwan sa Oktubre, 2 ka gold medals ang naangkon sa Cebu Pink Paddlers dragon boat team sa ilang pagsalmot sa Keelung International dragon boat festival. Ang Cebu Pink Paddlers maoy nag-inusarang contingent gikan sa Pilipinas nga misalmot sa maong kompetisyon .
Sa pakighinabi sa Bombo Radyo sa Team captain sa grupo nga si Ann Georgia Solante , gibutyag niini nga wa sila makatuo nga malupig pa nila ang team gikan sa Los Angeles, Hongkong ug Taiwan nga ilang category alang sa mga cancer survivors. Matud pa niini nga sa upat ka grupo nga misalmot sa maong category, ang contingent gikan sa Pilipinas maoy pinaka bata nga grupo sanglit naporma lamang ang grupo niadtong buwan sa Abril karong karong tuig itandi sa ilang kaatabang nga 10 na katuig nga naumol.
Matud pa ni Solante nga naglisud gayud sila sa pagkumbinse sa uyban pang mga cancer survivors nga musalmot sa ilang grupo gumikan na usab sa ilang kondisyon. Matud pa nga kasagaran kanila ang kulang ug kumpyansa sa ilang kaugalingon ug wala pay suporta sa pamilya. Apan sa dihang nagsugod na sila sa pagbansay bansay , nasinati nila ang maayo nga epekto niini sa ilang panglawas diin nakatabang ug maayo sa ilang gibati nga kasakit human sa operasyon.
Tungud niini didto na nakumpleto ang ilang 15 ka mga miembro ug sa sulod sa 5 ka buwan nga pagbansay bansay nalangkat gayud nila ang kalampusan. Gihimug-atan ni Solante nga silang mga cancer survivors maoy buhing pamatuod nga bisan ug nasakit man ang usa ka tawo, dili kini mamahimong babag aron mabuhat ang mga butang nga mabuhat sa mga normal nga tawo.
Usa usab matud pa kini ka pamaagi aron mapakita nila sa uban nga dili kinahanglan mawad-an ug paglaum sanglit kanunay nga nag-uban kanato ang Ginoo.
