CENTRAL VISAYAS- Gipasabot sa Department of Education Central Visayas (DepEd 7) nga resulta sa lalom nga mga pagtuon ug konsultasyon ang gisugyot nga paggamit sa trimester school calendar aron masiguro ang mas lig-on ug walay putol nga oras sa pagtudlo ug pagkat-on sa mga estudyante.
Matod pa ni Maurita Ponce, ang Chief sa Curriculum and Learning Management Division sa DepEd 7, lahi ang maong kalendaryo sa kasamtangang quarter system tungod kay tulo lamang ka termino o trimester ang pagabuhaton sulod sa usa ka tuig-tingtungha o school year.
Gipasabot ni Ponce nga ang matag termino adunay opening block, instructional block, ug end-of-term block aron mas ma-organisar ang mga kalihokan sa eskwelahan ug malikayan ang kanunay nga pagkabalda sa klase.
Usa sa mga dakong hinungdan sa pagsuporta sa trimester calendar mao ang paghatag og mas taas nga uninterrupted instructional days alang sa mga magtutudlo ug estudyante.
Kana gumikan kay kasagaran nga maapektuhan ang regular nga klase tungod sa mga selebrasyon, holidays, school activities, kalamidad, ug dili malikayang dautang kahimtang sa panahon.
Dugang pa niya, pinaagi sa trimester setup, mahimo nang ibutang sa katapusan sa matag termino ang mga kalihokan sama sa assessments, school events, ug ubang administrative requirements aron dili kini makatandog sa regular nga pagtudlo sulod sa classroom.
Makatabang usab kini sa paghan-ay sa mga training ug seminar sa mga magtutudlo, ilabina kadtong gipahigayon sa regional ug national level, aron dili na kinahanglanon ang kanunay nga pagkuha sa mga teacher gikan sa ilang mga klase.
Subay sa pamahayag sa DepEd 7, ang maong proposal nagtumong sa pagpalig-on sa kalidad sa edukasyon pinaagi sa mas organisado ug episyenteng paggamit sa oras sa pagkat-on sa mga estudyante sa rehiyon.
