Cebu City– Nangayo dayon ug paggiya si Lingayen Dagupan Archbishop Emeritus Oscar Cruz ngadto na ni Cebu Archbishop Emeritus Ricardo Cardinal Vidal sa dihjang naabot kaniya ang balita nga nagtaliwan na kini.
Matud ni Archbishop Cruz nga pagkadawat niya sa maong balita, miampo kini dayon apan dili alang nga makaabot si Vidal sa kinabuhing walay katapusan sanglit dako ang pagtuo niini nga nakaabot na didto ang Cardinal.
Gibutyag ni Cruz nga tungud sa kabuotan ni Cardinal Vidal sigurado gayud nga nakasulod dayon kini sa langit. Matud pa nga bisan ug dili pa Santo apan giisip na ni Cruz nga usa ka balaan si Vidal gumikan sa pagkamapainubuson niini.
Dugang pa ni Cruz nga si Vidal usa ka tawo nga walay problema ug dili kahibaw masuko maong wala kini nakasugat ug kontra ug wala pa gyud siyay nahibaw-an nga dunay nakasulti ug dautan sa mitaliwan nga Cardinal.
Dugang pa niini nga si Cardinal Vidal maoy nag inusarang Cardinal sa Pilipinas nga nagduso aron mamahimong santo ang duha ka mga Pilipino nga sila si San Pedro Calungsod ug San Lorenzo Ruiz samtang nabiyaan usab ni Cardinal Vidal ang tinguha nga mamahimong santos ang usa ka pari sa Sugbo nga si Father Teofilo Camomot
