CARMEN,CEBU- Gihingusgan sa Carmen Municipal Police Station ang ilang mga lakang ug programa aron mapalambo ang kahimtangan sa peace and order sa lungsod, pinaagi sa mga inisyatibang mas duol ug mas masabtan sa katawhan.
Gipadayag ni Police Major Jude Cebrero, Hepe sa Carmen Municipal Police Station, sa iyang pakighinabi sa Bombo Radyo Cebu, nga usa sa mga programa nga ilang ginapatuman mao ang Integrated Community Engagement and Barangay Security Project (iCEBS), nga nagtumong sa pagpalig-on sa relasyon tali sa kapulisan ug komunidad pinaagi sa direktang pag-adto sa mga purok.
Matod pa ni Major Cebrero, mas epektibo ang pagduol mismo sa komunidad kaysa magpabilin lamang sa barangay hall, kay mas dali ug mas diretso nilang madungog ang mga kabalaka ug panginahanglan sa katawhan.
Kini gihimo kauban ang mga lokal nga opisyal sa munisipyo ug barangay, aron mas mapalig-on ang koordinasyon ug mas mahimong epektibo ang pagsulbad sa mga problema sa kaluwasan.
Dugang pa, usa usab sa mga kalihokan nga ilang gipatuman mao ang Santa COPS on Wheels, diin naglibot ang mobile patrol car nga adunay musika ug nanghatag og pamaskong regalo alang sa mga kabataan.
Giingon sa hepe nga ang maong kalihokan dili lamang paghatag og kalipay sa mga bata, kondili usa usab ka paagi aron mapalig-on ang pagsalig sa katawhan sa kapulisan ug mapalambu ang pagbati sa kaluwasan sa mga pamilya, ilabi na karong panahon sa Pasko.
Gipasiugda usab ni Major Cebrero nga hugot ang koordinasyon sa mga opisyal sa barangay aron masiguro ang kaluwasan sa tanan samtang gihimo ang kalihokan.
Gisaad sa PNP Carmen nga ipadayon ang susamang community programs bisan human sa Pasko, isip kabahin sa ilang padayon nga paningkamot alang sa malinawon ug progresibong lungsod sa Carmen.
