Hingpit nagayud nga gitangtang sa House of Representatives si Cavite 4th District Representative Kiko Barzaga.
Si JC Abalos, chairman sa ethics committee, miingon nga ang pamatasan ni Barzaga sa House of Representatives dili na angay sa usa ka magbabalaod.
Pipila sa iyang mga kalapasan naglakip sa: Repeated interruption of plenary sessions; mockery of leadership nga naglakip kang kanhi House Speaker Martin Romualdez ug Unauthorized ug slanderous live broadcast atol sa mga sesyon sa budget plenary.
Dugang ni Abalos nga ilang nakita nga si Barzaga nakalapas sa pamatasan nga angay sundon isip miyembro sa House of Representatives.
Sa wala pa ang maong boto, gilauman na ni Barzaga nga permanente na siyang matangtang isip magbabalaod.
Hinuon, wala nagmahay ang 27-anyos nga magbabalaod inay ‘okay’ niini nga mapalagpot siya isip House member.
Kapin sa two-thirds o 265 ka mga magbabalaod ang mipabor sa mga nahibal-an sa House ethics committee sa Committee Report.
Mahinumduman nga ang 27-anyos nga si Barzaga gisuspenso kaduha sulod sa 60 ka adlaw tungod sa iyang mga post sa social media nga nag-akusar sa nagkalain-laing mga krimen batok sa iyang mga kaubang magbabalaod ug pipila ka mga taas nga opisyal sa gobyerno.
Samtang, nangita na og pundo ang Commission on Elections (COMELEC) aron sa posibleng pagpahigayon og special elections sa ikaupat nga distrito sa Cavite human sa pagkabakante sa pwesto niini.
Matud ni COMELEC Chairman George Erwin Garcia nga ang poll body walay budget nga gigahin alang sa maong eleksyon tungod kay wala kini sa ilang mga pagpangandam sa kasamtangang tuig.
Gipasabot ni Garcia nga subay sa balaod, gikinahanglan nga ipahigayon ang special elections aron mapuno ang bakanteng pwesto sa House. Apan, kinahanglan una nga mahibal-an sa COMELEC kung asa kuhaon ang gikinahanglan nga pondo alang niini.
