Nanawagan si Senate Minority Leader Alan Peter Cayetano sa Korte Suprema nga daling mohimo og desisyon bahin sa isyu sa gikinahanglang gidaghanon sa mga boto alang sa impeachment aron malikayan ang kawalay kasegurohan taliwala sa mga krisis nga giatubang sa nasud.
Nahitabo kini human gipasaka ang duha ka petisyon nga nagkuwestiyon sa desisyon sa Senado nga ipaubos ang “two-thirds threshold” gikan sa 16 ngadto sa 14 ka boto, base lamang sa mga senador nga aktwal nga makapartisipar.
Matod ni Cayetano, importante kaayo nga masulbad dayon ang maong isyu tungod kay ang pormula sa pag-ihap sa boto nga gikuwestiyon mahimong makaapekto sa ubang mahinungdanong gimbuhaton sa Senado, sama sa pagkab-ot sa “quorum” ug pag-apruba sa mga tratado.
Gipasiugda sa senador nga bisan pa man og nagpabilin ang ilang pagsalig sa sistema sa balaod sa nasud, sensitibo kaayo kini nga butang tungod sa mga konsiderasyon sa politika ug balaod nga nalambigit niini.
Giklaro usab niya nga ang pito ka miyembro sa Minority Bloc nagpabiling nagkahiusa sa ilang mga katungdanan isip mga magbabalaod, bisan pa man og adunay managlahi nga baruganan bahin sa impeachment.
Dugang pa ni Cayetano nga walay “majority” o “minority bloc” sulod sa Impeachment Court, sanglit ang matag senador naggamit sa ilang kaugalingong paghukom kung moabot na ang panahon sa pagpagawas sa desisyon.
