Gipasiguro sa Senado ang mas lig-on nga panalipod alang sa mga kabataan human opisyal nga giaprobahan sa ikatulo ug katapusang pagbasa ang Senate Bill 2426 o ang “Comprehensive School Safety Act” pinaagi sa 17 ka paborableng boto, nga walay supak o nipugong sa pagboto.
Ang maong balaodnon nagtuyo sa paghimo og usa ka maayo ug aktibong sistema aron mapanalipdan ang mga pampubliko ug pampribadong tunghaan sa tibuok nasod batok sa physical threats, kaangol, ug nagkalain-laing emerhensya.
Ubos sa maong maong balaod, gidisenyo nga ang matag tunghaan adunay kaugalingong localized School Safety Plan ug mga nga proteksyon nga angay sundon.
Gipahayag sa balaodnon ang pagdili sa nagkalain-laing porma sa pang-abuso ug hulga sulod sa mga tunghaan sama sa kaangol, child abuse, bullying, cyber-bullying, online abuse, digital harm, diskriminasyon, harassment, gender-based violence, corporal punishment, ug balos gikan man sa mga estudyante o mga personahe sa eskwelahan.
Subay niini, nagpadayag sa iyang dakong pasalamat si Senador Bam Aquino, ug nagkanayon nga mao kini ang pamaagi aron makabaton og klarong sistema sa paglikay, emergency response, ug recovery, diin gihangyo usab ni Aquino ang kagamhanan nga sigurohon dayon ang kasiguruhan sa mga tunghaan aron dili mahimong normal sa nasod ang mga insidente sa pagpamusil sa eskwelahan.
Sumala sa principal author sa balaodnon nga si Senador Raffy Tulfo, ang maong sugyot nga balaod makatabang sa pagtubag sa daghang kakuwangon sa kasamtangang sistema.
Pamaagi sa maong balaod, magbutang og mga CCTV sa mga classrooms ug mga pampublikong dapit sa tunghaan, kauban ang paghatag og counseling ug psychological support sa pakigtambayayong sa Department of Health.
Gidugang usab ni Senador Joel Villanueva ang kaimportante sa pagkontrol sa paggamit sa mga gadgets sulod sa oras sa klase gawas lamang kon kini alang sa pagtuon o emerhensya.
Gipasabot usab ni Senador Francis Pangilinan nga ang seguridad sa eskwelahan dili lang bahin sa mga gwardya, rehas, ug metal detector, kundi naglakip usab sa pisikal, emosyonal, ug digital nga kaayohan sa mga estudyante.
Samtang gipadayag usab ni Senador Robinhood Padilla nga ang balaodnon magduso sa mas klarong sistema sa proteksyon, nagpahinumdom usab si Senate Minority Leader Alan Peter Cayetano sa kaimportante sa igong panahon sa mga ginikanan alang sa ilang mga anak, ilabi na nga sa kasamtangan mas taas pa ang gigugol nga oras sa mga batan-on sa ilang mga cellphone kay sa ilang mga ginikanan, eskwelahan, ug simbahan.
