Giaprubahan na sa ikaduhang pagbasa sa Senado ang Senate Bill No. 2426 o ang Comprehensive School Safety Act kagahapong adlawa, Setyembre 15, nga nagtumong sa paghimo og nasudnong sistema aron mapalig-on ang seguridad ug proteksyon sa mga estudyante ug personahe sa mga tunghaan.
Ubos niining maong sugyot, tukoron ang National Comprehensive School Safety Framework nga nakapokus sa tulo ka pangunang lakang: prevention, response, ug recovery.
Lakip sa mga probisyon niini ang pag-ila sa mga posibleng peligro, pagbansay sa mga magtutudlo, ginikanan, ug mga lider sa estudyante, ingon man ang pagpatuman og klarong emergency protocols, communication systems, ug regular nga safety drills.
Ipaabot usab sa maong balaod ang psychosocial support ug trauma-informed care alang sa mga maapektuhan sa insidente sa kagubot o uban pang emerhensya.
Aron mapalig-on ang physical security sa mga tunghaan, gihisgutan usab ang pagbutang og mga CCTV camera, metal detector, ug security screening depende sa gihimong risk assessment ug panginahanglan sa kada eskwelahan.
Giduso ni Senador Bam Aquino ang maong sugyot human sa mga sunod-sunod nga insidente sa karahasan sa mga tunghaan, lakip na ang pagpamusil sa Tacloban City nga nikalas og tulo ka estudyante.
Nakadawat usab kini og bug-os nga suporta gikan ni Department of Education (DepEd) Secretary Sonny Angara, kinsa nag-ingon nga makatabang ang maong sugyot aron mahimong permanente ug mapondohan pag-ayo ang mga programa sa DepEd alang sa campus security, anti-bullying, ug mental health.
