CEBU CITY-Gipaubos og usa ka surprise drug testing ang 118 ka mga sakop sa kapulisan sa Cebu City Police Office (CCPO) nagmarka sa ikaduhang phase sa nagpadayong internal cleansing efforts niini.
Ang unang phase sa drug testing kay gipahigayon niadtong Disyembre 2024 diin nasutang walay miusa ka pulis ang nagpositibo sa ginadiling drugas.
Gisiguro sab ni Police Col. Enrico Figueroa, ang OIC-City Director sa CCPO nga tinguha sa mga opisyales niini ang padayong pagbarog sa integridad sa mga kapulisan nga nagserbisyo sa katawhang Sugbuanon.
Dugang ni Police Col. Figueroa nga ang drug testing nagtumong sa pagsiguro sa ilang sakop nga tiunay ang pagpatuman sa balaod niini ug ingon sab nga mahimong modelo sa komunidad.
Gipanglantawan nga mugawas ang resulta sa drug test sa umaabot nga semana sa buwan sa Pebrero.
Ang surprise drug testing kay kabahin sa nagpadayong internal cleansing program sa nasudnong kapulisan sa pagsiguro nga wala nalambigit sa ginadiling drugas ang ilang sakop.