CEBU CITY- Nangandam ang Cebu City Police Office (CCPO) og lima (5) ka mga bus aron magsilbing temporary custodial facilities sa mga indibidwal nga makadala og kasamok ug kagubot sa panahon sa Sinulog Grand Parade sa ga dagkong kadalanan sa dakbayan inig Enero 19, 2025.
Matod pa sa kapulisan sa dakbayan nga ila kining gi-request sa buhatan ni Cebu City Mayor Raymond Alvin Garcia sa paggamit sa mga city buses isip mobile detention facility.
Ang lima ka mga bus ipakatap sa rota sa parada diin ang bisan kinsa nga mga tawo nga nagpahinabog kasamok o makahimog mga krimen sama sa pagpangawat, pagpanguot, o pagmugna og kasamok kay prisohon sa mga pulis ug mga force multiplier nga gibutang sa daplin sa kadalanan.
Ang matag bus adunay mga imbestigador nga gi-assign sa pagdokumento sa mga kalapasan, ug kung adunay angay nga mga kaso ang ipasaka kung gikinahanglan.
Dugang usab sa kapulisan sa dakbayan ang ilang striktong pagpatuman sa liquor ban sulod sa 300-meter radius sa routa sa parada na sugdan alas 6 sa buntag hangtod alas 8 sa gabii sa Sabado, Enero 18 ug sa alas 12:01 sa tungang gabii hangtod alas 10 sa gabii sa Enero 19.
Gidili usab ang mga street parties nga usa sa mga tinubdan sa kagubot sa adlawng kapistahan.
