CEBU CITY – Naglisud ang mga pulis nga sugdan ang imbestigasyon sa nahitabung pag-ambush ni Atty. Inocencio Dela Cerna.
Kini ang giangkun ni Cebu City Police Office Director Police Colonel Gemma Vinluan.
Matud ni Colonel Vinluan nga wala pa gayud nila nasugdan ang pormal nga imbestigasyon sa maong insidente gumikan kay hangtud karun giingung wala sa gihapun miluwat ug affidavit si Atty Dela Cerna.
Sigon pa sa director nga wala pa sila’y igu nga impormasyon arun nga sugdan ang imbestigasyon.
Gipahibalu niini nga nag-request na unta sila ug Special Task Group apan sa gihapun dili sila makasugud gumikan kay wala’y pormal nga pamahayag nga gihatag kanila si Atty Dela Cerna.
Subay niini, giawhag ni Colonel Vinluan ang nahisgutang abogado nga mu-kooperar kanila arun nga masulbad na ang maong kaso.
Samtang, nanghinaut ang police director nga muhatag ug pagsalig ang katawhan sa kapulisan gumikan kay gihimu nila ang ilahang trabaho ug gikinahanglan ang kooperasyon arun nga dili mag-hari ang mga kriminal sa syudad sa Sugbo.
