CEBU CITY-Gihimakak ni Raquel Arce, ang pangu sa Cebu City Transportation Office (CCTO) ang pasangil batok kaniya nga mikatap online nga nagpuyo kini sa iyang opisina nga libre abangan (rent), kuryente, ug tubig uban sa iyang duha ka mga anak.
Kini human ang kanhi empleyado sa CCTO ug social media in-charge niini nga si Ronald Ravina o mas giila sa pangalang “Inday Nalda” sa usa ka Facebook post niadtong Sabado, Enero 4, 2024 nga mipasangil kang Arce nga nagpuyo sulod sa CCTO Office sa South Road Properties (SRP).
Dugang pa ni Inday Nalda nga ang duha ka babayeng anak sab ni Arce kay uban sa mga nagputo sa CCTO SRP Office ug mga empleyado sa Cebu City Government isip mga job order personnel bisan paman nga nagtungha pa kini.
Gipulong sab ni Inday Nalda nga adunay daw kasayuran si Dismissed Cebu City Mayor Michael Rama ug Cebu City Mayor Raymond Alvin Garcia apan gilabyan ra kini nga kasayuran.
Apan giklaro sab ni Arce nga magpalabay lang kini sa gabii sa iyang opisina sa higayong adunay ispesyal nga operasyon ilang buhatan ilabi na niadtong Pasko ug karong umaabot Sinulog.
Dugang sab niya nga iyang duha ka babayeng anak kay mga trabahante sa City Market Office ug Prevention Restoration Order Beautification Enhancement (Probe) team diin dili kini magpwesto sa iyang opisina.
Tataw pa ni Arce nga nag-ugat ang alegasyon ni Inday Nalda niadtong gitaktak kini sa posisyon sa ispeculasyon ikiha kini sa usa ka istasyon sa radio kabahin sa batang namatay kay nadat-ugan sa fencing sa Pasil pipila ka buwan nang milabay.
