MANDAUE CITY – Nakadawat og pasidungog ang Mandaue City Disaster Risk Reduction and Management Office (CDRRMO) atol sa DRRM Partners Appreciation Program sa Gawad Kalasag Regional Awarding Ceremony nga gipahigayon sa usa ka hotel sa Dakbayan sa Sugbo, kagahapon, Pebrero 16, 2026.
Gihatagan ang Dakbayan sa Mandaue og Gawad Kalasag Seal sa ilalom sa Local DRRM Office and Council category, isip usa sa mga nag-unang highly urbanized cities sa nasod nga adunay lig-on nga programa sa disaster risk reduction and management.
Ang maong pasidungog adunay kalakip nga sulat gikan sa National Disaster Risk Reduction and Management Council (NDRRMC) isip pag-ila sa maayong performance sa siyudad sa pagpatuman sa mga programa batok sa mga kalamidad.
Personal nga gidawat nila Mayor Thadeo “Jonkie” Ouano ug CDRRMO Head Buddy Ybañez ang award.
Sumala sa mga opisyales, ang pag-ila resulta sa aktibong partisipasyon sa siyudad sa regional level, maayong serbisyo, ug hugot nga commitment sa pagpalig-on sa disaster preparedness ug response mechanism sa dakbayan.
Ang awarding ceremony gitambongan sa mga hepe ug representante sa nagkadaiyang Local DRRMO, mga mayor sa probinsya sa Sugbo, mga representante sa Office of Civil Defense, ug uban pang mga opisyal gikan sa nagkadaiyang rehiyon sa nasod.
Padayon ang panawagan sa lokal nga kagamhanan sa publiko nga magpabiling alerto ug makig-alayon sa mga programa sa disaster risk reduction aron malikayan ang dakong kadaut sa panahon sa kalamidad.
