CEBU-Gi-uyonan ni Cebu Archbishop Jose Palma sa lakang karun sa Katolikong Simbahan nga tugotan nga mag-minyo ang mga ‘permanent deacon’ sa Pilipinas.
Kini subay sa pag-aprobar ni Pope Francis sa petisyon nga giduso sa Catholic Bishops’ Conference of the Philippines (CBCP) alang sa pag-establisar og ‘permanent diaconate’ sa nasud.
Ang mao nga desisyon kay nagtinguha sa pagsulbad sa nagkadako nga gintang sa gidaghanon sa mga pari ug mga tumutuong Katoliko sa nasud.
Gipasabot usab nga ang tanang ‘deacons’ ang mamahimong mag-minyo, diin sa Katolikong Simbahan kay adunay duha ka matang sa deacon, ang transitional ug permanent.
Ang transitional deacon kay nagplano o nagtinguha nga hingpit mahimong pari, samtang ang mga permanent deacon kay nagpabilin sa simbahan sa taas nga panahon isip diyakono.
Nasayran nga sumala sa Code of Canon Law, ang usa ka lalaki nga minyo kay mahimong permanente nga deacon kung kini 35-anyos, ug adunay pagtugot sa iyahang asawa, ingon man 25-anyos alang sa mga dili minyo nga lalaki.
