CEBU CITY-Mipadayag sa iyang mensahe sa paglaum ug kalinaw si Cebu Archbishop Jose Palma atol sa pakighinabi niini sa mga tigbalita sa Archbishop’s Palace ning dakbayan sa Sugbo kagahapong adlawa sa Sabado, Disyembre 21, 2024.
Nunot kini sa selebrasyon sunod tuig para sa Jubilee Year 2025 sa simbahang katolika nga nag-agak sa temang “Pilgrims of Hope”.
Gipahinumduman sa Arsobispo ang tanan nga ang paglaum usa ka makanunayon nga kusog nga dili mapakyas, ug gipamatud-an ang kinaiyanhon nga bili sa matag indibidwal, bisan unsa pa ang ilang kahimtang.
Sa iyang pamulong, gihimug-atan niini ang bili sa matag usa bisan paman sa nagkalain-lain tampo nato sa katilingban.
Mihatag sab sa iyang mga pamulong nga makalibkas sa mga kasakit sa dugahan ang Arsobispo ilabi na sa mga indibidwal nga hilabihan ang nasinati nga kalisod nga maabot sa punto nga mawalaan na og paglaum.
Samtang nagsingabot ang Pasko, gipaambit ni Palma ang iyang kinasingkasing nga pangandoy alang sa usa ka matang sa kalinaw nga mopatigbabaw sa kahadlok ug kawalay kasiguruhan.
Gitapos sa Arsobispo ang iyang mensahe pinaagi sa panawagan alang sa panaghiusa ug kaluoy.
