PROVINCE OF CEBU- Nang-apod ang Kagamhanang Lalawigan sa Sugbo og libreng bugas ngadto sa mga drayber sa Public Utility Jeepneys (PUJs) nga apektado ang pangita tungod sa krisis sa krudo karong panahona.
Gipahigayon ang maong pagpang-apod sa libreng bugas nga tag 10-kilos matag benepisyaryo sa Cebu Capitol grounds kagahapong adlawa sa Huwebes, Abril 9.
Namugna ang maong programa sa pakigtambayayong sa Kapitolyo sa Sugbo ug sa Land Transportation Franchising and Regulatory Board – Central Visayas (LTFRB-7) aron abagan ang mga apektadong PUJ drivers.
Kapin 2,000 ka mga drayber sa jeep ang gilaumang makapanghimulos sa maong programa sa unang batch palang niini og gilaumang mas mudaghan pa kini sa musunod nga tranches sa hinabang nga bugas.
Aron makakuha sa libreng bugas, ang PUJ driver kay gikinahanglan lang mubisita sa Kapitolyo ug sutaon kung naapil ba kini sa lista nga gikan sa masterlist sa LTFRB-7.
Base sa impormasyon nga nagtagana ang Kapitolyo sa P150-milyones nga budget alang sa maong programa diin usa lang kini sa mga lakang nga gipasiugda sa kagamhanang lalawigan sa pag-alibyo sa kalisod sa sektor sa transportasyon karong padayon pa ang pagsaka sa presyo sa produktong petrolyo.
