Gipahibalo ni Presidente Ferdinand Marcos Jr. ang pagpatuman sa P10 kada litro nga pagkunhod sa presyo sa krudo alang sa mga public utility vehicle (PUV), nga adunay maximum nga 150 ka litro kada semana sulod sa tulo ka bulan.
Sa usa ka video message gikan sa Presidente, ang maong programa magsugod sa National Capital Region sa sunod semana ug palapdan sa umaabot nga mga adlaw hangtod nga kini mapatuman sa tibuok nasud.
Ang maong lakang nagtumong sa pagpakunhod dili lamang sa gasto sa transportasyon apan pagpugong usab sa pagsaka sa presyo sa pagkaon ug uban pang mga batakang panginahanglan.
Gipasabot usab sa Presidente nga ang fuel subsidy ipatuman usab sa mga lehitimong gasolinahan nga giaprobahan ug gimonitor sa Department of Energy aron masiguro nga dili kini maabuso.
Gipasiugda sa Chief Executive nga ang programa kabahin sa mga paningkamot sa gobyerno sa pagmintinar sa maayong kahimtang sa panginabuhi sa mga Pilipino ug pagpanalipod sa ilang kaayohan.
Samtang, ang UPLIFT Committee nagkita pag-usab sa Malacañang Palace aron hisgutan ang pinakabag-ong mga kalamboan sa Middle East ug ang epekto niini sa nasud, labi na sa padayon nga pagsaka sa presyo sa krudo.
Agig tubag, gipahibalo sa Presidente nga ang Department of Transportation mopatuman sa service contracting program sugod Abril 15.
Ubos sa maong programa, ang mga operator ug drayber bayran og P40 ngadto sa P100 kada kilometro.
Sumala sa Presidente, ang mga commuter adunay labing menos 20% nga diskwento.
Ang programa mosakop sa gibana-bana nga 50,000 ka PUV, 1,000 ka operator, ug hangtod sa 15 milyon nga mga pasahero sa tibuok nasud.
Kini mag-focus sa mga ruta nga konektado sa mga tren ug mga mayor nga ruta sa bus aron mapaayo ang dagan sa pagbiyahe.
Ang programa ipatuman atol sa mga oras nga dili peak ug ang mga sakyanan butangan og GPS monitoring aron masiguro ang hapsay ug aktuwal nga serbisyo.
