CEBU CITY-Mipasar og mas striktong lagda sa balaod ang kagamhanang dakbayan sa Sugbo sa paggamit og mga pabuto (firecrackers) sulod sa syudad.
Kini aron masiguro ang kaluwasan og malayo sa hilabihang insidente ang publiko karong holiday season isip kabahin sa tradisyong sa mga Pilipino sa pagpabuto ug paggamit sa mga nagkadaiyang pyrotechnic devices.
Ang kamandoan kay pinirmahan ni Cebu City Mayor Raymond Alvin Garcia pinaagi sa Executive Order No. 26, Series of 2024 nga gilagdaan niadto pang Disyembre 19 ug gisapublikar niadtong Disyembre 23.
Nagmando kini sa pagregulate sa manufacturing, sale, distribution, ug paggamit sa fireworks aron makunhuran ang posibilidad sa agka-angol ug mapanalipdan ang mga kinabuhi ug mga kabutangan.
Ang executive order nagkuha ug awtoridad gikan sa RA No. 7183, nga nagmando sa regulasyon sa mga pabuto alang sa kaluwasan sa publiko ug nasudnong seguridad, ug RA No. 7160, o ang Local Government Code of 1991, nga naghatag sa mga lokal nga kagamhanan sa gahum sa pagpanalipod sa kaayohan sa komunidad.
Epektibo dayon sa pagpirma ang naasoy nga executive order nga magpabilin nga ipatuman hangtod opisyal kining i-revoke.
Pinaagi niini nga mga lakang, tumong sa kagamhanang dakbayan sa Sugbo nga mapalambo ang mas luwas nga palibot samtang gipasidungog ang kalipay ug tradisyon sa pagsaulog karong holiday season.
