CEBU – Kung maaprobahan, ang gisugyot ni Cebu City Mayor Michael Rama nga P50 bilyones nga budget alang sa 2023 mao ang pinakadakong budget nga napasar sa kasaysayan sa dakbayan.
Nasayran nga naglihok karon ang dakbayan gamit ang giaprobahan nga budget nga halos P9 bilyones.
Gi-transmit sa Office of the Mayor ngadto sa Sangguniang Panlungsod ang gisugyot nga budget alang sa 2023 wala madugay human usab kini nagpadala og hangyo alang sa pagpasa sa ikatulong supplemental budget alang sa 2022 nga mokabat sa P1.3 bilyon.
Tinguha ni Mayor Rama nga makatukod og dul-an sa 200 ka medium-rise buildings aron puy-an sa mga informal settlers o kadtong mga pamilya nga nag-okupar sa mga pribadong lote.
Gani, matod pa ni Cebu City Vice Mayor Raymond Garcia nga iyaha na kining na-refer sa Committee on Budget and Finance nga gipangulohan ni Konsehal Noel Wenceslao.
Gitino ni Garcia nga hatagan nila og higayon ug tyansa ang ang komitiba sa paglili sa maong sugyot nga budget sa mayor.
