LAPU-LAPU CITY, CEBU- Gidala sa kapulisan ngadto sa estasyon sa pulis ang pipila ka mga aktibista sa Greenpeace Philippines human sila nagpahigayon og protesta duol sa venue sa ika-48 nga ASEAN Summit 2026 sa Sugbo aron manawagan og mas lig-on nga aksyon batok sa polusyon ug plastic waste crisis sa rehiyon, karung adlawa Biyernes, Mayo 8, 2026.
Sumala sa grupo, upat ka mga aktibista ang gidala ngadto sa Lapu-Lapu Police Station 2 ug nagpabiling detained hangtod sa pagsulat niini nga report bisan wala pa’y pormal nga reklamo nga napasaka batok kanila.
Ang maong protesta gipahigayon duol sa Mactan Newtown diin gipahigayon ang summit nga gitambongan sa mga lider ug opisyal gikan sa nagkalain-laing nasud sa Southeast Asia.
Sa ilang pahayag, gihagit sa Greenpeace ang mga lider sa ASEAN nga tapuson ang pagsalig sa fossil fuels, papanubagon ang mga korporasyong responsable sa polusyon, ug palig-onon ang mga polisiya batok sa single-use plastics ug waste crisis nga nakaapekto na sa daghang komunidad sa rehiyon.
Matud pa sa grupo, dili ang peaceful activism ang tinuod nga hulga kondili ang padayon nga pagdagsa sa plastik ug polusyon nga nagdala og kadaot sa panglawas, panginabuhian, ug kinabuhi sa mga katawhan sa Southeast Asia.
