CEBU, PHILIPPINES- Giatubang ni Malacañang Press Officer ug Undersecretary Claire Castro ang mga sakop sa media aron mohatag og updates kabahin sa mga kalihokan nga may kalabutan sa ika-48 nga ASEAN Summit 2026 ug motubag sa mga kasamtangang isyu atol sa press briefing nga gipahigayon sa International Media Center (IMC) sa Sugbo.
Atol sa briefing, gihisgutan ang kaso nga naglambigit kang Franco Mabanta, founder sa Peanut Gallery Media Network, kinsa gi-aresto tungod sa giingong kaso sa extortion nga may kalabutan kang kanhi House Speaker Martin Romualdez.
Base sa report sa mga awtoridad, gibana-bana nga ₱70 milyon nga kantidad sa kuwarta ang nakumpiska atol sa operasyon nga giingong konektado sa reklamo ni Romualdez.
Sumala sa inisyal nga imbestigasyon, si Mabanta giingong nangayo og kantidad baylo sa dili pagpagawas sa usa ka video nga nagkonektar kang Romualdez sa giingong mga iregularidad sa flood control projects.
Samtang nagpadayon pa ang imbestigasyon, giingon sa mga awtoridad nga gipaabot pa ang dugang detalye samtang gipadayon ang pag-verify sa mga ebidensya ug mga pangangkon sa kaso.
Matod ni Castro, ang bugtong tumong ni Presidente Ferdinand Marcos Jr. mao nga manubag ang bisan kinsang adunay tulubagon, ilabi na kon adunay nahimong kalapasan o krimen. Apan, giklaro usab niini nga ang tanang proseso kinahanglan magsunod sa due process.
Sa dihang gipangutana si Castro kabahin sa koneksyon ni Mabanta kang Presidente Marcos, gihimakak niini nga managhigala ang duha.
Gipresentar usab ni Castro ang mga litrato nga nagpakita kang Mabanta uban ni kanhi Presidente Rodrigo Duterte ug Bise Presidente Sara Duterte aron pabulaanan ang mga alegasyon nga adunay koneksyon ang akusado sa Presidente.
Giklaro ni Castro nga walay lig-on nga basihan ang mga hungihong nga si Mabanta adunay personal nga relasyon kang Marcos, ug gipasiugda nga ang kaso kinahanglan pasagdan nga madumala pinaagi sa hustong proseso sa balaod.
