CEBU, PHILIPPINES —Gideklarar sa Malacañang ang Mayo 6 hangtod 8, 2026 isip special non-working days dili lamang sa Dakbayan sa Lapu-Lapu ug lungsod sa Cordova, kondili apil na usab sa Cebu City ug Mandaue City, isip kabahin sa preparasyon alang sa ika-48 nga ASEAN Summit nga pagahimoon dinhi sa Sugbo.
Base sa Proclamation No. 1238 nga gipirmahan niadtong Mayo 4, ug giusab pinaagi sa pinakabag-ong anunsyo, gitugotan ang temporaryong pagsuspenso sa trabaho sa mga nasangpit nga lugar, lakip ang tibuok Mactan Island, maoy nag-unang venue sa pagdawat sa mga foreign delegates ug high-level meetings.
Sumala kang President Ferdinand Marcos Jr., pinaagi kang Acting Executive Secretary Ralph G. Recto, tumong sa maong deklarasyon nga mapagaan ang trapiko ug masiguro ang seguridad sa tanang partisipante sa summit.
Gikumpirma sa mga otoridad nga ang Lapu-Lapu City ug Cordova maoy mga key hosting areas, diin ang Mactan Island magsilbing sentro sa billeting, meetings, ug security operations.
Gilauman nga dako ang epekto sa tulo ka adlaw nga holiday sa pagminus sa lihok sa mga trabahante, pagkunhod sa adlaw-adlaw nga negosyo, ug pagluag sa trapiko ilabi na sa mga dalan padulong sa mga venue ug hotel.
Samtang nagpadayon ang pag-andam, gipaabot usab sa lokal nga panggamhanan ang mas hugot nga seguridad, convoy movements, ug posible nga restricted access sa pipila ka bahin sa Mactan ug ubang dakbayan sulod sa maong panahon.
Pagahimoon ang ika-48 nga ASEAN Summit ug related meetings sa Mayo 7 ug 8, uban sa pag-abot sa mga pangulo sa nagkadaiyang nasud nga nagsugod na.
Gilauman ang presensya sa labing menos 11 ka world leaders ug dagkong foreign delegations, hinungdan sa mas pinahugot nga seguridad ug preparasyon sa host areas.
