CEBU – Nibahad si Cebu City Mayor Mike Rama nga kung dili matuman sa kontraktor ang gipirmahan nga humanon ang edepisyo sa Cebu City Medical Center hangtod na sa ika-10 nga andana sa wala pa o tumong sa iyang adlaw nga natawhan iyang ipaputol o ipakanselar ang kontrata niini.
Kini human sa iyang pagbisita sa tambalanan niadtong adlaw nga Miyerkules diin nahisagmuyo kinin tungod sa kalangay sa trabaho sa kontraktor aron humanon ang katapusang tulo ka mga andana sa maong tambalanan.
Aduna palay pito ka mga andana ang tambalan hinungdan nga niadtong Abril 6 iyahang gimandoan ang kontraktor nga tiwason ang tibuok edepisyo sa dili pa o tumong sa Oktubre 28 nga iyahang adlawng natawhan.
Sa gipirmahan nga kontrata tali ni Mayor Rama ug sa M.E. Sicat Construction, nisaad ang kontraktor nga mahuman ang tambalanan karong Oktubre 28.
Gibaharan sa mayor ang tinugyanan sa M.E. Sicat construction nga iyahang kanselahon ang kontrata kung mapakyas kini sa paghuman sa edepisyo sa maong petsa.
Hinuon, gipasalig ni Engr. Lowell Corminal sa Department of Engineering and Public Works sa kagamhanan nga kayang kab-oton ang maong katuyoan.
