CEBU – Nideklarar og state of calamity si Cebu City Mayor Mike Rama tungod na usab sa rekomendasyon sa City Disaster Risk Reduction and Management Council.
Nihangyo usab si Rama og dinaliang tigom sa Konseho sa dakbayan aron maaksyonan ang iyang deklarasyon.
Gideklarar usab niini nga No Work, No Classes karong adlawa isip preventive measure tungod kay nahimong bagyo ang #AgatonPH ug padayong nagdala og kusog nga ulan sa siyudad nga adunay intertropical convergence zone.
Ang nagluntad nga dili maayo nga panahon sulod sa pipila ka adlaw nakamugna og pagbaha ug pagdahili sa yuta sa pipila ka bahin sa dakbayan sa niaging 24 oras.
Gibutang usab sa red alert ang CDRRMO QRT.
Nipahibaw si Cebu City Disaster Risk Reduction and Management Council Chairman Gerardo Carillo nga gihimo na karon ang mga evacuation sa landslide ug flash flood areas.
Gi-awhag usab ni Carillo ang mga residente nga mokontak sa Cebu City Emergency cellphone number alang sa bisan unsang emergency.
Alas 7:30 sa buntag niadtong Domingo, nag-landfall si Agaton sa Calicoan Island sa Guiuan, Eastern Samar.
Tungod niini, nakanselar ang mga biyahe sa ubang isla.
Sa 5 pm bulletin, gipaubos sa PAGASA ang lima ka lugar sa Visayas ug Mindanao ubos sa Tropical Cyclone Wind Signal (TCWS) No.1.
Miigo usab ang Bagyong Agaton sa nagkadaiyang bahin sa Kabisay-an ug adunay mga tawo nga gikataho nga namatay tungod sa epekto sa bagyo.
Sa Negros Oriental, tulo ka tawo ang gikataho nga patay, usa niini upat ka tuig nga bata nga gikatahong nalumos sa sapa sa Barangay Bongalonan, Basay, Negros Oriental.
Sa pagkakaron, gipasaka sa Signal number 1 ang amihanang-sidlakang bahin sa Sugbo (Daanbantayan, Medellin, Bantayan Islands, Bogo City, San Remigio, Tabogon, Borbon, Tabuelan, Sogod, Catmon, Carmen, Danao City, Compostela, Liloan) lakip ang Camotes Island, sa silangang bahin sa Bohol (Buenavista, Danao, Dagohoy, Pilar, Guindulman, Candijay, Mabini, Alicia, Ubay, San Miguel, Pres. Carlos P. Garcia, Trinidad, Bien Unido, Talibon, Jetafe) .
