CENTRAL VISAYAS- Nanghawod ang Cebu City sa 2026 Central Visayas Regional Athletic Association (CVIRAA) Meet human matapos ang kompetisyon karong adlawa Huwebes, Marso 27.
Base sa opisyal nga Facebook post sa Department of Education (DepEd) alas 10:59 sa gabii, nag-una ang Cebu City sa overall medal tally uban sa 146 ka bulawan, 105 ka silver, ug 100 ka bronze medals.
Sa ikaduhang pwesto ang Bohol Province nga adunay 84 ka bulawan, 85 ka silver, ug 75 ka bronze, samtang misunod sa ikatulong pwesto ang Cebu Province nga adunay 49-78-91.
Naa sa ika-upat nga pwesto ang Lapu-Lapu City nga adunay 41-41-39, samtang ang Mandaue City nakompleto sa top five uban sa 34-47-77.
Misunod sa ika-unom ang Tagbilaran City nga adunay 32-29-47, gisundan sa Talisay City nga may 15-13-16 ug Toledo City nga may 15-9-16.
Natapos sa ika-siyam ang Danao City nga adunay 11-8-31, ika-10 ang Carcar City nga may 5-10-11, ika-11 ang City of Naga nga may 0-5-9, samtang nagtak-op sa medal tally ang Bogo City nga adunay 0-1-3.
Gibuksan ang CVIRAA niadtong Domingo, Marso 22 ug nagtumong sa pagpili sa mga top athletes nga mopadayun sa umaabot nga Palarong Pambansa, diin gipakita sa mga atleta sa Central Visayas ang ilang kusog, talento ug disiplina sa nagkadaiyang sporting events.
