Nagplano si Cebu Governor Pamela Baricuatro nga magtukod og bag-ong koalisyon nga gitawag og Governors for Good Governance, nga gisundog sa Mayors for Good Governance (M4GG).
Matud ni Baricuatro, nga ang grupo mopasiugda sa transparency ug accountability sa mga gobernador.
Gipasabot usab niini nga ang inisyatiba sa usa ka Facebook post niadtong Septiyembre 6, diin iyang gipaambit ang hulagway gikan sa iyang pagpakigkita kang Pasig City Mayor Vico Sotto.
Si Baricuatro niingon nga siya ug si Sotto managsama og tumong, lakip ang pakigbatok sa korapsyon ug pagpasiugda sa maayong pagdumala.
Dugang usab niini nga si Sotto mipaambit og mga tips ug guidelines kon unsaon paglusad sa bag-ong coalition ug gilauman nga mobisita sa Sugbo sa dili madugay alang sa usa ka M4GG event.
Ang M4GG naglakip sa mga mayor sama nila ni Baguio City Mayor Benjie Magalong ug Quezon City Mayor Joy Belmonte.
Si Magalong bag-o lang gitudlo isip usa ka special adviser sa Independent Commission for Infrastructure (ICI), usa sa mga inisyatibo batok sa korapsyon ni Presidente Ferdinand Marcos Jr.
Sa laing bahin, gipaambit usab ni Baricuatro sa Facebook nga nakigkita siya kang Bise Presidente Sara Duterte sa Manila niadtong Septiyembre 6, nga naghulagway sa miting nga “mabungahon.” Matod niya nga ilang gihisgutan ang governance matters ug si kanhi Presidente Rodrigo Duterte.
Pipila lang ka adlaw ang milabay, niadtong Septiyembre 3, nakigtagbo usab si Baricuatro kang Presidente Marcos. Niadtong Septembre 2, atol sa espesyal nga general assembly sa League of Provinces of the Philippines (LPP), gitudlo siya nga bise presidente sa Ways and Means sa LPP, diin si Marcos ang nagdumala sa iyang panumpa sa katungdanan.
