Nihimo og kinalit nga inspeksyon si Cebu Governor Pamela Baricuatro sa bypass road project sa lungsod sa Dumanjug kagahapong adlawa, Agosto 22.
Kini nunot sa nadawat nga reklamo sa Kapitolyo kalabot sa environmental concerns ilabina ang risgo sa pagbaha kay giingong moagi kini sa natural water ponds.
Hinungdan nga gipatawag ang mga personahe sa Department of Public Works and Highways 7th engineering district aron ipahibalo sa gobernadora ang mga detalye sa maong proyekto.
Subay niini, nagpadala usab og sulat ang gobernador ngadto sa DPWH aron mahatagan siya og listahan sa tanang nahuman ug nagpadayon nga flood control projects gikan sa 2022 hangtod 2025.
Matod ni Baricuatro, kining maong impormasyon maoy gamiton aron masabtan ang kahimtang karon sa baha sa tibuok probinsiya.
Gidugang usab sa opisyal nga ang maong lakang kay mohatag og dalan sa Kapitolyo sa epektibong pagsuhid ug pagpatuman sa mga estratehiya sa hiniusang pagtubag ug pagpagaan sa nagpadayong mga isyu nga nakaapekto sa probinsiya.
