Gipahigayon ang pinakaunang Cebu Industrial Summit sa dakbayan sa Mandaue niadtong Miyerkules, Oktubre 29, 2025.
Ang kalihokan naghisgot sa kamahinungdanon sa mga industriya sa Sugbo nga adunay tema nga “Invest in Cebu: Powering Industry in Progress”.
Gibida sa maong summit ang mga pamulong sa mga dagkong opisyal sa kagamhanan ug sa sektor sa pamatigayon sama nila Cebu Governor Pamela “Pam” Baricuatro, Provincial Administrator Atty. Joseph Felix “Ace” Durano, Philippine Economic Zone Authority Deputy Director General for Policy and Planning Maria Veronica Magsino, President ug CEO sa Aboitiz Land ug pangu sa Aboitiz Economic Estates nga si Rafael Fernandez de Mesa, ug Senior Vice President ug COO sa Distribution Busness Group sa Aboitiz Power Corporation nga si Anton Mari Percides ug uban pa.
Gitambogan sa mga pundok sa tigpamuhunan ug tigpamatigayon sa Sugbo ang maong kalihukan sa paglantaw sa plano sa pagpalambo sa ekonomikanhong industriya sa lalawigan sa pakig-alayon sa pampubliko ug pribadong sektor.
Sa iyang mensahe, si Gov. Baricuatro mihisgot nga ang Sugbo kay modelo sa industrial excellence ug human-centered growth tungod sa diversified nga economic portfolios niini sama sa IT-BPM, renewable energy, medium to heavy industries, manufacturing, poultry and livestock production, ug tourism and heritage.
Pasalig sa maong kalihukan nga mas epektibong mapatuman ang mga planong pagtul-id sa burukrasya ug koneksyon sa mga tigpamatigayon sa ilang mga mamumuo.
