Andam sa mga posibleng hagit sa baha sa tibuok lalawigan sa Sugbo ang buhatan sa Cebu Provincial Disaster Risk Reduction and Management Office (PDRRMO) karong panahon sa ting-uwan.
Kini ang gibutyag ni Engr. Wilson Ramos, Interim Officer sa Cebu PDRRMO sa pakighinabi sa Bombo Radyo Cebu Newsteam diin nanukad kini sa panghitabo sa pagbaha sa pipila ka bahin sa MEtro Cebu sa mga nakalabayng adlaw nunot na sab sa kusog nga bundak sa uwan sa taas nga panahon.
Giklaro sab niini nga luwas ra ang mga lumulupyo sa mga dapit nga nakasinati og pagbaha ilabi na katong mga residente doul sa mga agianan sa tubig sama nalang sa sapa.
Kampante ra sab ang buhatan sa pagka-alisto sa mga Sugbuanon tungod na sab sa ilang aktibong information drive kabahin sa masinating panahon sa lalawigan karong miabot na ug mulahutay pa ang ting-uwan.
Gani padayong pahimangno sa mga awtoridad sa publiko nga magpabilin alerto ug maalamon sa lakat sa panahon karong rainy season sa nasud ilabi na kung nagpuyo sa mga delikadong mga dapit.
