CEBU – Naglaraw ang Kagamhanan sa Probinsiya sa Sugbo nga makabawi og dugang mga lote nga ilang gidonar apan wala magamit sa orihinal nga katuyoan niini.
Kini ang gipahibawo sa Kapitolyo nga gusto nilang mabawi ang propiedad nga gipanag-iya sa probinsiya sa PC Hills, Barangay Lahug, dakbayan sa Sugbo.
kung diin ang mga bahin sa propyedad gigamit nga puy-anan sa mga opisyal sa Philippine National Police (PNP) nga nadestino sa Sugbo ug pipila ka mga informal settlers.
Nasayran nga si Gobernador Gwendolyn Garcia bag-o lang nakigtagbo sa mga dagkong opisyal sa Police Regional Office sa Central Visayas (PRO-7), lakip ni Director Police Brig. Gen. Roque Eduardo Vega, aron hisgutan ang dangatan sa mga lote nga gipanag-iya sa Kapitolyo sa PC Hills.
Ang Kapitolyo adunay katungod sa pagbawi sa Lots No. 1157 ug No. 1158 sa PC Hills sanglit ang Philippine Constabulary (PC), ang gisundan sa Philippine National Police (PNP), nabungkag na niadtong 1991.
Atol sa ilang bag-o nga tigom sa PRO-7, ang Provincial Legal Office nipasabot nga ang deed of donation nga naglangkob sa maong mga propyedad nag-ingon nga kon dili na kinahanglan sa Philippine Constabulary ang mga parsela sa yuta, kinahanglan kining ibalik sa kagamhanang probinsiyal.
Samtang sa bahin, ni Garcia nisugyot usab kini sa Kapitolyo ug PNP, pinaagi sa PRO-7, nga mosulod og Memorandum of Understanding (MOU) aron mapormal ug hapsay ang ilang negosasyon.
