CEBU CITY-Makabalik na ang mga sidewalk vendors sa kanhi nila pwesto sa una sa dalan Colon. Kini ang nahimong desisyon sa pagmeeting nila Cebu City Mayor Edgardo Labella, Department of Interior and Local Government (DILG).Apan kini temporararyo lamang.
Sa nakab-ot nga desisyon, gitagaan sa mayor ang mga sidewalk vendors ug higayon nga makabalik og tinda sa ilang kanhi pwesto sa dalan Colon apan sa adlaw lamang nga Sabado ug Dominggo sugod karong Disyembre 1 hangtud Enero 30.
Gitino sa mayor nga magsilbi kini nga probationary period kung diin obserbaran ang mga vendors ug kung makita nga nakamintinar sila sa kalimpyo sa dalan ug dili masamok ang mga mangagi, posible nga hingpit na sila nga makabalik sa ilang kanhi nga pwesto.
Siguroon gyud matud pa sa mga vendors nga dili sila maka-ali ug makasamok sa dalan.
‘Gamay nga kadaugan’
Gikonsiderar nga “gamay” nga kadaugan alang ni Maria Pino ang presidente Cebu City United Vendors Association (CCUVA) ang nahimong desisyon sa DILG.
Kini tungod kay matud pa ni Pino gamay lang usab kini nga nahatag sa DILG ug sa Mayor alang kanila gumikan kay duha ka adlaw raman.
Hinoon, gitino niini nga nagpasalamat sila nga duna na’y night market nga adto maninda ang mga vendors matag Lunes hangtud Biyernes.Daw sama nga naka-uyon usab si Pino nga ang mga displaced vendors lang ang makatinda sa nightmarket ug makatinda sila dinhi hangtud nga mapahimutang na sila og tarong.
Hangyo lang ni Pino sa publiko sa oras nga mabalik na sila sa sidewalk nga sabton lang ang ilang kahimtang sanglit sayod matud pa si Pino nga daghan na usab ang kritiko sa oras nga makabalik sila.
Hangyo usab ni Pino sa mga vendors nga disiplinahon ang ilang kaugalingon ug musubay gyud sa mga guidelines.Kini matud pa ang barometro nga sila hingpit na makabalik gyud sa ilang pwesto sa una.
Nasayran nga 2×2 gihapon ang sukod sa ilang mga stall ug dili gyud sila pwede nga mulapas.
