CENTRAL VISAYAS- Nakahatag og dakong garbo sa lungsod sa Balamban ang kalampusan sa Cebuana engineer nga si Arianne “Nikki” Jubay Lazaro human nahimong kabahin sa Artemis II mission sa NASA—usa ka misyon nga giila nga dakong lakang sa pagbalik sa katawhan sa Bulan.
Si Lazaro, nga nagtrabaho isip Senior Materials Engineer sa Orion Fracture Control Team, adunay responsibilidad sa pagsiguro sa kalig-on ug kaluwasan sa spacecraft, lakip na ang mga kritikal nga sistema sama sa Environmental Control and Life Support System.
Gihatagan usab og espesyal nga pag-ila ang iyang ginikanan nga sila Ethel Jubay Lazaro, nga lumad sa Aliwanay, Balamban, ug Alberto Lazaro, ingon man ang iyang mga apohan nga sila Rogelio “Rolly” Jubay ug Josephine “Bebe” Jubay, nga mitabang sa paghulma sa iyang panaw padulong sa kalampusan.
Matod pa sa lokal nga kagamhanan, ang iyang kahusayan ug dedikasyon nagpakita sa kahinungdanon sa disiplina ug paningkamot sa larangan sa siyensya ug teknolohiya, samtang nag-amot sa kaluwasan sa mga astronaut ug sa padayon nga pagpalapad sa kahibalo sa kawanangan.
Dugang pa, nga si Lazaro nahimong inspirasyon sa kabatan-onan sa Balamban ug sa ubang dapit, nga nagpamatuod nga ang mga damgo mahimong makab-ot pinaagi sa kugi ug determinasyon.
Gipadayag sa LGU Balamban ang ilang dako nga pasidungog ug pagpasalamat sa iyang nahimong ambag sa internasyonal nga entablado.
