CEBU CITY-Pamilya maoy inspirasyon ni LAICA PAULINE IGOT UY, ang talagsaong Cebuana nga nakasulod sa Rank 10 sa bag-o lang gipagawas nga Philippine Nurses Licensure Examination Mayo 2024.
Matud pa ni Uy nga nadugay siya sa pag-review tungod kay imbes mag-test siya niadtong Nobyembre sa miaging tuig uban sa iyang mga klasmeyt, nakahukom siya nga magpakuha niini niadtong Mayo aron mas makapangandam siya.
Nagkuha siyag personal nga rutina sa ubang topnotchers sa lain-laing kurso para makauyon ka sa iyang study routine gawas sa review center.
Iyang gipahinumdoman ang uban nga dili mag-overstudy kondili mag-focus sa panglawas aron epektibo ang gitun-an ug mahilayo sa mga sakit.
Kanunay nga achiever si Uy ug nakagradwar pa gani isip Cum Laude sa iyang Unibersidad diin siya nagtungha sa kolehiyo.
Ang kabalaka giingong maoy labing dakong babag dili lang alang kaniya kon dili sa tanang board takers nga nagdamgo nga makapasar sa nasangpit nga pasulit.
Wa sab siyay plano nga mo-abroad bisan pa sa pait nga kasinatian sa mga Nurse sa nasud nga gikonsiderar nga “overworked & underpaid”.
Pangandoy ni Uy nga makasulod sa Medical School sa sunod nga yugto sa iyang career.
