CEBU CITY- Naglunsad og GoFundMe campaign ang mga kauban ug higala aron matabangan ang pamilya sa 20-anyos nga Cebuano nga si Karlo Bul-anon gikan sa Consolacion, Cebu sa pagpauli sa iyang patay nga lawas dinhi sa Sugbo human malumos sa Gold Coast, Australia.
Ang biktima usa ka international student nga nagtuon sa Australia ug naglaum unta nga makatrabaho ug makapuyo sa nasud human sa iyang pag-eskwela.
Sa pagkakaron, nakalikom na og kapin 20,000 Australian dollars gikan sa labaw 390 ka donors, batok sa target nga 40,000 Australian dollars.
Sa pakighinabi sa Bombo News Team, gipaambit ni Denmark Suede, Bombo International News Correspondent sa Australia, nga mahal ang gasto sa repatriation sa patay nga lawas nga mahimong moabot sa 15,000 hangtod 20,000 Australian dollars.
Gibutyag usab ni Suede nga gideklarar nga missing si Bol-anon human kini malumos sa dagat sa Gold Coast niadtong Martes.
Tungod niini, gilunsad dayon sa mga awtoridad ang search and rescue operation gamit ang speedboat ug helicopter.
Apan, nakit-an ang lawas sa biktima sa misunod nga adlaw, Miyerkules.
Sumala pa ni Suede, ilado ang Gold Coast isip popular nga tourist destination ug surfing paradise, apan adunay dagkong balod nga mahimong delikado alang sa mga dili eksperto sa paglangoy sa dagat.
Ang maong insidente nagpahinumdom sa mga international students sa kahinungdanon sa pag-amping sa kaluwasan ug pagseguro nga kompleto ang insurance coverage, aron malikayan ang dako nga gasto kung adunay mahitabo nga aksidente.
