Nagkahiusa ang United States (US), United Kingdom (UK), ug Australia nga mopalambo sa underwater drone technology.
Ang maong lakang nagtumong sa pagpanalipod sa mga kable sa komunikasyon sa ilalom sa dagat ug sa pagpalig-on sa depensa sa ilang alyansa sa militar nga nailhan nga Aukus.
Sumala ni UK Defense Secretary John Healey, gilauman nga mamahimo nang magamit sa sunod tuig ang maong teknolohiya sa uncrewed undersea vehicle (UUV) o mga de-pasaherong sakyanan sa ilalom sa dagat nga walay drayber.
Wala hinuon gipahibalo sa alyansa kung pila ang kinatibuk-ang kantidad sa maong proyekto, apan gipahayag nga ang UK motampo og mokabat sa $201 ka milyon.
Gihimo ang maong pahibalo atol sa usa ka defense ministers security summit nga gipahigayon didto sa Singapore.
Ang kasabutan sa Aukus defense, nga pormal nga nagsugod niadtong 2021, nagpasalig sa tulo ka mga nasod sa pagtukod og mga nuclear submarine ug sa pagpaambit sa ilang mga kahanas sa militar.
