CEBU CITY – Napahimutang na ang mga delegado sa Central Visayas alang sa Palarong Pambansa 2019 ngadtu sa dakbayan sa Davao.
Gipahibalu ni Cebu City Councilor Augustus Young, ang chairman sa Committee on Education, nga niadtu pang adlaw nga Martes naabut sa Davao City ang mga athletes sa Central Visayas ug kadaghanan niini nagagikan sa dakbayan sa Sugbo.
Matud ni Young nga halos 500 ka mga delegates ang nagagikan sa Central Visayas diin ang kadaghanan niini nagagikan sa dakbayan sa Sugbo.
“Naay taga-Bohol, taga-Dumaguete, naay taga-province, ug Lapu-Lapu unya ang kadaghanan kay ang ato lang gihapon sa Cebu City,” sigon pa ni Young.
Gipanghinaut ni Young nga makahakut ug mga medalya ang Central Visayas sa nahisgutang sporting event.
Samtang, giklaru ni Young nga kung adunay mga ginikanan nga gustung mu apas sa ilahang mga anak hayan dili na kini gastu sa Department of Education (DepED) VII, inay personal na kini nila nga gastu.
Gibana-banang moabot sa 15,000 ka mga atleta, coaches, ug game officials sa tibuok Pilipinas ang magtapok sa Davao City alang sa Palarong Pambansa nga magsugod karong Dominggo, Abril 28.
