Mukabat sa kapin sa 7,000 ka mga regular nga mga empleyado sa Mandaue City Hall ang makakita og dakong pagkunhod sa ilang anniversary bonus karong tuiga, diin ang kantidad mous-os gikan sa P15,000 ngadto sa P3,000 matag empleyado.
Kini nga pagbag-o moabut agig tubag sa usa ka pagrepaso sa Commission on Audit (COA), nga nagtimaan sa nangaging mga pagbayad nga kulang sa ligal nga sukaranan ug mahimo nga dili regular.
Matod pa ni Mandaue City Councilor Marie Immaline Cortes-Zafra, ang Chairperson sa Committee on Appropriations Budget and Finance sa maong dakbayan kinsa nipahibawo nga ang mga kawani sa nahisgotang dakbayan makadawat sa pagkunhod sa P3,000 nga bonus subay sa guidelines sa COA.
Ingon man nga kini nga adjustment nagtumong sa pagpugong sa umaabot nga mga disallowance ug pagsunod sa mga direktiba sa komisyon.
Dugang pa sa konsehal nga niadtong tuig 2023, ang Mandaue City Government nigahin og P11.61 milyones aron mahatagan og P15,000 nga cash bonuses ang mga empleyado niini sa pagsaulog sa ika-54 nga Charter Anniversary sa dakbayan niadtong Agosto 30.
Gawas sa mga regular nga mga empleyado, lakip na ang personal ug city officials, nga makadawat sa P3,000 nga anniversary bonus, ang job order personnel makakita sa inadlaw nga umento sa honorarium nga P57 gikan sa Abril hangtod Hulyo, nga mokabat sa kapin sa P5,000.
Dugang pa nga ang clean and green personnel ug mga Barangay Health Workers (BHWs) makadawat og P2,400 matag usa isip kabahin sa anniversary incentives.
Apan wala pa gibutyag ni Konsehal Cortes-Zafra ang budget alang sa charter day bonus karong tuiga.
Magsaulog sa ika-55 nga anibersaryo ang dakbayan sa Mandaue sa umaabot Agosto 30.
