Gipili sa Council of ASEAN Chief Justices (CACJ) si Philippine Supreme Court Chief Justice Alexander G. Gesmundo isip bag-ong chair atol sa 11th meeting nga gipahigayon sa usa sa mga resort sa Lapu-Lapu City.
Diin ang upat ka adlaw nga kalihokan kay gitambungan sa mga ‘top judiciary officials’ nga anaa sa gibana-bana nga 130 ka mga CACJ participants lakip na niini ang 100 ka mga langyaw nga delegado gikan sa tibuok Southeast Asia aron sa palig-onon sa regional judicial collaboration.
Sa iyang acceptance speech, gipasalamatan ni Gesmundo ang iyang mga kaubang chief justice sa Association of Southeast Asian Nations sa pagpili kaniya nga mangulo sa konseho, usa ka posisyon nga iyang gihulagway nga usa ka pribilihiyo ug dako nga responsibilidad ug sa hilabihang mga hagit, kalisdanan, ug kausaban sa sistema sa hustisya sa matag hurisdiksyon.
Dugang pa niini nga ang mga hudikatura sa ASEAN kinahanglan nga magpabiling abli sa pagbag-o aron magpabilin nga may kalabotan sa pamaagi sa kinabuhi sa ilang mga tawo.
Ang CACJ, nga nailhan kaniadto nga ASEAN Chief Justices Meeting (ACJM), natukod sa Singapore niadtong Agosto 23, 2013 diin ang mga miyembro niini mao ang 10 ka mga punong mahistrado sa Brunei Darussalam, Cambodia, Indonesia, Laos, Malaysia, Myanmar, Pilipinas, Singapore, Thailand, ug Vietnam.
Sa iyang charter, ang CACJ nagtinguha sa pagpalig-on sa demokrasya, pagpalambo sa maayong pagdumala, pagpauswag sa mga prinsipyo sa Rule of Law, ug sa pagpalambo sa kalinaw, kalig-on, ug kauswagan sa ASEAN nga rehiyon pinaagi sa kooperasyon, panaghigalaay ug pagsinabtanay sa mga Hudikatura sa ASEAN Member States.
