Giangkon sa China nga naghimo sila og joint military ug naval drill sa Russia sa habagatang bahin niini nga gitawag og Joint Sea-2024.
Basi sa pahayag nga gipagawas sa Chinese Defense Ministry, ang duha ka nasud nagsugod sa military drill sa ‘sayo sa Hulyo’ ug molungtad hangtud sa tunga-tunga sa kasamtangang bulan.
Dakong bahin sa maong drill ang gihimo sa katubigan ug hangin sa Zhanjiang City, sa habagatan sa lalawigan sa Guangdong diin ang duha ka nasod nagpakita sa kapabilidad sa pagsulbad sa mga hulga sa kadagatan.
Gipakita usab niini ang katakus sa duha ka mga nasud sa pagpadayon sa kalinaw ug kalig-on sa kalibutan ug rehiyon nga magkauban.
Matod sa ministro, ang military drill gihimo, basi sa tinuig nga plano sa China ug Russia nga adunay military engagement.
Nalakip sa maong drill mao ang pag-abot ug pagtigom sa mga missile destroyers, guided missile frigates, suppliers, ug uban pang butang sa militar sa habagatang baybayon sa China.
Gipahibalo kini sa China, pagkahuman sa miting tali sa mga lider sa National Atlantic Treaty Organization (NATO) sa Washington, diin ang mga nasud nga miyembro nagpamatuod pag-usab sa ilang suporta alang sa Ukraine.
Sa maong tigum, gipagawas usab sa NATO ang usa ka pahayag diin gitawag niini ang China nga ‘decisive enabler’ sa pagsulong sa Russia sa Ukraine.
Kini nga drill sa militar nahiuyon sa gisugdan kaniadto nga drill tali sa China ug Belarus, usa usab ka nailhan nga kaalyado sa Russia.
