Gi-extradite sa Thailand ang wanted nga gambling kingpin nga si She Zhijiang padulong sa country-of-origin niini nga sa China niadtong Miyerkules, Nobyembre 12.
Sumala sa Thai police nga gipatuman nila kini human ang korte sa Thailand mihukom niadtong milabay nga semana sa pagtapos sa tulo ka tuig nga kaso niini gihusay sa maong nasud.
Ang 43-anyos nga si She Zhijiang kay usa ka Chinese national nga naghupot og Cambodian passport diin niadtong Agosto 2022 kay nadakpan kini sa Thai police human giluwatan og international warrant ug Interpol red notice nga gi-request sa China sa pasangil nga nagpadagan kini og illegal nga pasugalan online.
Ang Thai criminal court mimando sa extradition niini niadtong Mayo 2024 ug gisegundahan ang desisyon niadtong Lunes, Nobyembre 10 human gihusay ang apelasyon niini.
Ma-extradite kini sa China aron atubangon ang mga kaso niini sa illegal nga casino ug gambling websites niyang gipadagan nga matod pa gigamit ang silingang nasud sa Myanmar nga base sa iyang mga illegal nga operasyon og money laundering.
Kahinumduman nga naila sa Pilipinas si She niadtong Septembre 2024 human mipatim-aw kini sa usa ka international news documentary nga nagbulgar nga si kanhi Bamban, Tarlac Mayor Alice Guo kay diay si Guo Hua Ping nga usa ka gituohang espiya gikan sa China.
