CEBU CITY– Close monitoring ang himoon karon sa LGU sa Mandaue, Sugbo ug ingon man ang Department of Health (DOH).
Kini ang nakab-ot nga desisyon human nga nagpahigayon ug close coordination meeting si Mandaue city Mayor Jonas Cortes ug Cebu City Mayor Edgardo Labella kalabot sa pagpositibo sa Butuanon River sa polio virus.
Usa sa ilang gitun-an ug nakita nga solusyon kalabot niini mao ang relocation nga sigon ni Mayor Cortes nga ongoing karon.
Matud usab ni Dr. Jaime Bernadas nga panghingusgan niini ang pagpangbakuna batok sa polio ug bisitahon niini ang kabalayan kung diin mitadlas ang Butuanon river aron usab sa pagtrace kung duna na ba’y nagpositibo sa polio apan gitino sa direktor nga wala pa’y polio victim sa rehiyon-7.
Samtang nagkanayon si Mayor Labella nga naghimo na ang City health officer og profiling sa mga area kung diin mitadlas ang Butunaon river nga sulod sa 5 kilometer radius nga mao ang Pit-os, Bacayan, Talamban ug bahin sa Banilad, Kasambagan ug Mabolo.
Padayon usab matud pa ang massive vaccination sa mga bata nga nag-edad ubos 5 anyos ug gi-awhag sa mayor ang publiko sa pagpanglimpyo sanglit makuha ang maong virus sa hugaw sa tao.
Hinay-hinayon usab matud pa ang mga informal settlers sa pagpabalhin sa mga medium rise building nga gilihok na matud pa sa mayor.
Dugang pa usab niini, gimando sa duha ka mayor nga dili usa hilabtan ang maong sapa ug undangon usa ang clean up drive sa mga kasapaan apan gitino niini nga sa umaabot ipadayon pa gihapon ang pagpanglimpyo sa mga kasapaan. | reports from Bombo Jun Salde
