Mosulod karong semanaha ang audit phase sa impeachment trial batok kang Bise Presidente Sara Duterte human ang mga saksi nga mipamatuod sa pagpagawas ug pagkuha sa P612.5 milyon nga confidential funds gikan sa Office of the Vice President ug sa Department of Education gipresentar sa miaging semana.
Sumala ni Tingog Party-list Rep. Jude Acidre, ang mga saksi gikan sa Commission on Audit (COA) ang sunod nga moatubang sa impeachment court aron ipasabut kung giunsa pag-audit ang confidential funds ug kung ang liquidation ug supporting documents nga gisumite nahiuyon ba sa kasamtangang mga lagda.
Diin gilauman nga unang motestigo ang kanhing COA State Auditor nga si Roderick Wamil ug ang kasamtangang Intelligence and Confidential Funds Audit Office Supervising Auditor nga si Celine May Del Campo. Samtang, ang sunod nga motambong mao ang House Legislative Information Resources Management Department Director nga si Marivic Pareja.
Dugang ni Acidre nga gikan sa pagsubay sa tinubdan ug pagkuha sa mga pundo, ang prosekusyon mopadayon na karon sa isyu kung giunsa kini paggasto ug kung kini ba na-liquidate sa husto.
Niadtong miaging semana, duha ka kanhing opisyal sa Land Bank ang nagpamatuod nga ang P612.5 milyon nga confidential funds gikan sa National Treasury ug hingpit nga gi-withdraw pinaagi sa pito ka tseke.
Ang mga saksi sa COA gilauman usab nga maghisgot sa direktiba sa komisyon nga ibalik ang P73.287 milyon nga confidential funds nga gipagawas sa OVP niadtong 2022, ingon man ang mga isyu nga mitumaw sa mga dokumento sa liquidation, lakip ang mga resibo sa pag-ila nga adunay sulod nga giingong mga peke nga ngalan ug uban pang giingong mga iregularidad nga unang gibutyag sa imbestigasyon sa House.
