CENTRAL VISAYAS- Nidagsa na ang mga pasahero sa mga pantalan sa siyudad samtang gipahigayon sa Coast Guard Central Visayas (CGDCV) ang inspeksyon ug pagpangandam subay sa Undas 2025, aron masiguro ang hapsay ug luwas nga pagbiyahe sa tanan.
Sa pakighinabi sa Bombo News Team, miingon si Capt. Jerome Lozada, Commander sa PCG-Cebu, nga 100 porsyento andam ang ilang pwersa aron masiguro nga walay samok ang pagbiyahe sa mga nag-unang pantalan sa siyudad.
Karong adlawa, Oktubre 31, 2025, nagpahigayon ang Coast Guard Station Central Cebu og inspeksyon ug monitoring sa Pier 1 ug Pier 3, kabahin sa ilang preparasyon alang sa Undas rush.
Nakataas usab ang alerto sa mga K9 unit, x-ray scanner, paneling team, ug uban pang security personnel aron bantayan ang gidili nga mga armas ug delikado nga mga butang.
Padayon ang koordinasyon sa Coast Guard, kapulisan, mga awtoridad sa pantalan, ug lokal nga gobyerno aron masiguro nga ang tanan nga pagbiyahe sa rehiyon hapsay, luwas, ug malinawon.
Gipahinumdoman usab sa Coast Guard ang mga pasahero nga mosunod sa regulasyon sa pantalan ug makigtambayayong sa mga awtoridad aron masiguro ang luwas ug hapsay nga biyahe karong Undas 2025.
