CENTRAL VISAYAS- Nagpagawas og pahibalo ang Coast Guard District Central Visayas human maapektuhan ang daghang pantalan sa rehiyon tungod sa dautang kondisyon sa panahon nga dala sa Tropical Depression Basyang.
Sumala sa report gikan alas 4:00 sa hapon hangtod alas 8:00 sa gabii Pebrero 5, 2026, adunay 863 ka mga pasahero nga na-stranded, lakip ang 54 ka mga barko, usa ka motorbanca, ug 486 ka mga rolling cargoes sa nagkalain-laing dagkong pantalan sa Central Visayas.
Samtang, anaa sa 115 ka mga barko ug 26 ka mga motorbanca ang kasamtangang nagpasilong sa nagkalain-laing mga pantalan isip mga precautionary measures batok sa padayon nga kabangis sa panahon.
Gipahayag sa Coast Guard District Central Visayas nga padayon ang ilang hugot nga pagmonitor sa kahimtangan sa dagat ug ilang gipahimangnoan ang publiko, ilabi na ang mga mangingisda ug gagmay nga mga operator sa sakayan, nga dili una molusad sa dagat hangtod nga mouswag ang panahon ug tangtangon ang mga opisyal nga pahibalo.
Sumala sa pinakabag-ong bulletin, ang Bagyong Basyang anaa na karon sa ibabaw sa Dagat sa Bohol ug padulong sa Central Visayas.
Gilauman nga magdala kini og kusog nga ulan ug paghagoros sa hangin sa mga apektadong lugar.
Gipasidan-an ang katawhan, ilabi na ang mga nagpuyo sa ubos nga lugar ug kabukiran, nga magmatngon batok sa posibleng pagbaha ug landslide.
