CEBU CITY – Dili sayon ug usa gayud ka hagit sa kapulisan sa dakbayan sa Sugbo ang pagbantay sa seguridad atol na siyam kaadlaw nga kasaulogan sa Sinulog 2020.
Kini ang paghulagway ni Cebu City Police Office Director Police Colonel Engelbert Soriano.
Sa eksklusibo nga pakighinabi sa Bombo Radyo Cebu, gi-asuy ni Colonel Soriano nga mao kadto ang pinakataas nga siyam kaadlaw nga iyahang nasinati sa tibuok niining kinabuhi ug alas 2 sa kaadlawon ang pinakasayo nga oras sa iyahang pagkatulog niadtong mga higayona.
Matud pa niini nga kada adlaw kini nga adunay ‘critic session’ kauban si PRO 7 Regional Director B/Gen. Valeriano De Leon, Cebu City Mayor Edgardo Labella, ingon man ang mga konsehal sa dakbayan nga naghupot sa peace and order committee.
Sigon ni Colonel Soriano nga nag-doble ang ilahang gipahigayon nga ‘security measures’ gumikan sa pagbisita ni Presidente Rodrigo Duterte.
Giingong hagit alang kaniya ang nakalabay nga Sinulog ilabi na nga bag-o pa lang kini dinhi sa dakbayan.
Hinuon, gikalipay ni Colonel Soriano ang dali nga pagsunod sa mga Sugbuanon sa mga patakaran sa kapulisan.
Nagkanayon ang police director nga mas dali ang trabaho sa kapulisan kung dili musupak ang publiko sa ilahang gipatuman nga mga polisiya.
